Iskuul Muslimiinta oo ku yaala dalka Holland oo xalay la qarxiyey

Xafiiska dacwada iyo tarbiyada
dacwah@hotmail.com

Posted by on Monday 8, November 2004 9:17 AM

Amsterdam :- Iskuul hoose oo ay lahaayeen Muslimiinta dalka Holland oo ku yaalay magaalada Eindhoven ayaa xalay saqdii dhexe la qarxiyey. Booliiska oo sheegay inuu adkeyn doono amaanka xarumaha Muslimka.

Weerarkan ayeysan cidina waxna ku noqon ayadoo wakhtigaasi aysan cidina ku sugneyn Iskuul dhexdiisa.

Illaa iyo hada lama yaqaan cida ka danbeysa weerarkan ayadoo loo aaneenayo in ay tahay aargoosasho la xidhiidha dilkii loo geystay Nin Hollandees ah oo aflaamta sameyn jiray oo todobaadkii lasoo dhaafay lagu dilay magaalada Amsterdam.

Thoe Van Gogh oo ah ninkii Salaasadii lasoo dhaafay lagu dilay Amsterdam ayaa ahaa nin aad Muslimka u neceb isla markaana sameeyey Film lagu caayayo Quraanka iyo Allaahey. Dilkiisa oo uu ka danbeeyey Wiil 26jir ah oo Muslim ah ayey ka xumaadeen dadka asal ahaan u dhashay dalka Holland.

Dilka ninkaasi ayaa sidoo kale keenay xiisad ka dhex aloosanta shacabka Muslimiinta ah iyo kuwa gaalada ah.

Weerarka xalay loo geystay iskuulka ku yaal magaalada Eindhoven ayaa ah kii ugu horeeyey oo lala beegsado dhanka muslimiinta.

Eindhoven ayaa ah magaalo ku taal koonfurta dalka Holland isla markaana ay ku dhaqan yihiin dad badan oo muslimiin ah oo ay ku jiraan jaaliyada Soomaalida oo caruurtooda iskuulkaasi la qarxiyey dhigan jireen.

Booliiska magaalada Eindhoven ayaa sheegay in ay illaalo ka qaban doonaan dhamaan goobaha Muslimiinta isugu timaado iyo Masaajidada waaweyn si markaa loo sugo amaanka muslimiinta.

Magaaladaasi ayey ku yaalaan shan Masaajid oo waaweyn oo midka ugu caansana ee Masjidul Furqaan ayey wax ka maamulaan Soomaalidu.

Maaha markii ugu horeysay oo weerar noocaan ah lagu qaado Iskuulka ugu weyn Muslimiinta ee Eindhoven waxaana hada kahor lagu tuuray iskuul kaasi dhaalooyin ay ku jiraan dab iyo baasiin, inkastoo ay tahay markii ugu horeysa oo bambaano lagu qarxiyo.